O próximo xoves 18 de abril de 2013, de 12 a 12:30, terá lugar na Aula 2.1b da FIC unha presentación conxunta das asociacións Enxeñería Sen Fronteiras e GPUL. O obxectivo da breve sesión é dar a coñecer as dúas asociacións á comunidade universitaria, a súa colaboración desde hai varios anos, e a importancia do software libre dentro do que se coñece como «tecnoloxía para o desenvolvemento humano» (TpDH).

Contamos coa vosa presenza!

UPDATE: A presentación, por se a alguén lle interesa: http://www.gpul.org/sites/default/files/ESF_GPUL.pdf

Dende o GPUL comprácenos anunciar unha nova edición das xa senlleiras Xornadas Libres, as cales consistirán, coma sempre, nunha serie de conferencias, obradoiros e concursos con contidos do máis heteroxéneo, pero sempre xirando arredor do mundo da Cultura Libre: software libre, hardware libre, estándares abertos, licencias, propiedade intelectual e un amplo etcétera.

 Ditas xornadas celebraranse do 22/04/2013 ó 26/04/2013 na Facultade de Informática da Universidade da Coruña, sendo a data de finalización de recepción de propostas o 04/04/2013 ás 23:59 horas.

ACTUALIZACIÓN:

Amplíase a data de finalización de recepción de propostas ata o 07/04/2013 ás 20:00 horas.

• O envío das mesmas farase a través da plataforma creada para tal fin, sendo preciso rexistro previo e cubrindo correctamente o respectivo formulario web.
• Será preciso adxuntar o material que se considere necesario para a avaliación da proposta (presentación ou similar, etc.).
• Aceptaranse propostas en galego, castelán, portugués, inglés e/ou francés.
• Calquera proposta que non cumpra coas anteditas normas será directamente rexeitada.

Dende a directiva gustaríanos agradecer de antemán as vosas propostas e a difusión do evento. Así mesmo agardamos que estas xornadas sexan do voso agrado.